மதுரையில் நண்பரின் இல்ல விழாவிற்கு, இரட்டை மனதுடன் கலந்துகொண்டேன், (கொரானா பெரும்தொற்று காரணம்) விழாவில் அவரின் உறவினர் ஒருவர் எனக்கு நன்கு அறிமுகமானவர் அருகில் அமர்ந்து இருந்தார். நலம்விசாரிப்புக்கு பின்னால் நிதியமைச்சரின் அறிவிப்பு பற்றி பேசத்தொடங்கினார் என்பதை காட்டிலும் கேள்வி கணைகளை தொடுத்தார் என்பதே சரியாகும்.
தற்போது ஆட்சியில் உள்ள ஒன்றிய அரசு மேற்கொண்ட அரசியல், பொருளாதார நடவடிக்கையினால் சிறு மட்டும் குறு நிலைப்பட்ட தொழில்கள் முடங்கியதால் பல லட்சம் தொழிலாளர்கள் வேலை இழந்து நிர்கதியாக தெருவில் குடும்பத்துடன் அலைந்தபோது உங்களின் நிலை என்னவாக இருந்தது. உங்களுக்கான சமூக பாதுகாப்புடன் குறைந்தபட்ச தேவைகளை சிரமமின்றி பூர்த்தி செய்து கொண்டீர்கள்.
பெட்ரோல் டீஸல் விலை உயர்வினால் அனைத்து பொருள்களும் விலையேற்றம் பெற்று ஒரு வேளை சோற்றுக்கே திண்டாட வேண்டிய நிலை ஏற்பட்டபோது நீங்கள் வழக்கம்போல் குறைந்த பாதிப்புடன் வாழ்க்கை நடத்திக்கொண்டு இருந்தீர்கள். இதற்கும் மேலாக பெரும்தொற்று காலத்தில் லாக்டவுன் என்ற பெயரில் தொடுக்கப்பட்ட தாக்குதல் ஏராளம். உண்ண உணவும் தண்ணீரும் இல்லாமல் பல்லாயிரம் கிலோமீட்டர் நடைபயணமாக வறியோர், முதியோர், குழந்தைகள் பெண்கள், ஊனமுற்றோர் நடந்து,வழியில் பலர் மடிந்து,பரிதவித்தபோது பாதுகாப்புடன் லாக்டவுனை கடந்தீர்கள். இரண்டாவது தொற்று முனைப்புடன் தாக்கி எங்களை கபளிகரம் செய்தபோது அதுபற்றி எவ்வித சிந்தனையின்றி சமூக உணர்வின்றி கடந்து சென்றீர்கள்.
பெருந்தொற்று, வேலையிழப்பு பசி பட்டினி என்று நாங்கள் உழன்று கொண்டு இருந்தபோது, வேலைக்கே செல்லாமல் லட்சத்தில் ஊதியம் பெற்றுவந்த ஆசிரியப் பெருமக்கள் நீதிமன்ற பாதுகாப்பினை பெற்று நெருக்கடி நிலையில் குறுகிய காலத்திற்கு( மீண்டும் வழக்கமாக பள்ளிகள் செயல்படும் வரை) மேற்கொள்ளலாம் என்று முயற்சித்த ஊதியக்குறைப்பை தடுத்து நிறுத்தினர்.
-தொடரும்....